ಎಚ್‌ಐವಿ/ಏಡ್ಸ್‌ ರೋಗಿಗಳಿಗಾಗಿ ಆಹಾರ ಕ್ರಮಗಳು

ಮನೀಷಾ ಮೋಹನಕುಮಾರ್‌,ಡಯಟೀಷಿಯನ್‌, ಕೆಎಂಸಿ, ಅತ್ತಾವರ, ಮಂಗಳೂರು. | Jun 24, 2013 ಕಳೆದ ಒಂದು ದಶಕದಿಂದ ಈಚೆಗೆ ಎಚ್‌ಐವಿ/ಏಡ್ಸ್‌ ರೋಗಿಗಳ ನಿರ್ವಹಣೆಯಲ್ಲಿ ಉತ್ತಮ ಪೋಷಕಾಂಶಗಳ ಆದ್ಯತೆಯು ಹೆಚ್ಚಾಗುತ್ತಿದೆ. ಏಡ್ಸ್‌ನ ಭಯಾನಕ ಪರಿಣಾಮಗಳ ವಿರುದ್ಧ ಹೋರಾಡುವಲ್ಲಿ ಪೋಷಣಾಭರಿತ ಆಹಾರಗಳು ಮಹತ್ವ ಪೂರ್ಣವಾದ ಸಾಧನಗಳಾಗಬಹುದು ಎಂದು ಇತ್ತೀಚಿನ ಸಂಶೋಧನೆಗಳ ವರದಿಗಳು ಹೇಳುತ್ತಿವೆ. ಉತ್ತಮ ಪೋಷಕಾಂಶಗಳು ಅಂದರೆ, ಸೇವಿಸಿದ ಆಹಾರದಿಂದ ಸಾಕಷ್ಟು ಪ್ರಮಾಣದಲ್ಲಿ ದೊಡ್ಡ ಪೋಷಕಾಂಶಗಳು ಮತ್ತು ಸೂಕ್ಷ್ಮ ಪೋಷಕಾಂಶಗಳನ್ನು ಪಡೆಯುವುದು. ದೊಡ್ಡ ಪೋಷಕಾಂಶಗಳು ಅಂದರೆ - ಕ್ಯಾಲೊರಿಗಳು (ಚೈತನ್ಯ): ಅಂದರೆ ಪ್ರೊಟೀನ್‌ಗಳು , ಕಾಬೋìಹೈಡ್ರೇಟ್ಸ್‌ ಮತ್ತು ಕೊಬ್ಬು. ಇವು ನಿಮ್ಮ ದೇಹದ ತೂಕವನ್ನು ನಿರ್ವಹಿಸಲು ಸಹಾಯ ಮಾಡುತ್ತವೆ. ಸೂಕ್ಷ್ಮ ಪೋಷಕಾಂಶಗಳು ಅಂದರೆ ವಿಟಾಮಿನ್‌ಗಳು ಮತ್ತು ಖನಿಜಾಂಶಗಳು. ಇವು ನಿಮ್ಮ ಜೀವಕೋಶಗಳು ಸರಿಯಾಗಿ ಕಾರ್ಯನಿರ್ವಹಿಸಲು ಸಹಕರಿಸುತ್ತವೆ. ಆದರೆ, ದೇಹದ ತೂಕ ಇಳಿಸುವಲ್ಲಿ ಇವುಗಳ ಪಾತ್ರವೇನೂ ಇಲ್ಲ. ಎಚ್‌ಐವಿ/ಏಡ್ಸ್‌ ಇರುವ ಅನೇಕ ರೋಗಿಗಳಿಗೆ ಉತ್ತಮ ಪೋಷಕಾಂಶಗಳದ್ದೇ ಸಮಸ್ಯೆಯಾಗಿರುತ್ತದೆ. ನಿಮ್ಮ ದೇಹವು ಯಾವುದಾದರೂ ಸೋಂಕಿನ ವಿರುದ್ಧ ಹೋರಾಡುತ್ತಿದೆ ಎಂದಾದರೆ, ಅದು ಹೆಚ್ಚಿನ ಶಕ್ತಿಯನ್ನು ಉಪಯೋಗಿಸುತ್ತಿರುತ್ತದೆ ಮತ್ತು ಇದಕ್ಕಾಗಿ ನೀವು ಸಾಮಾನ್ಯಕ್ಕಿಂತಲೂ ಹೆಚ್ಚಿನ ಆಹಾರವನ್ನು ಸೇವಿಸಬೇಕಾಗುತ್ತದೆ. ಆದರೆ, ಸಾಮಾನ್ಯವಾಗಿ ಅಸೌಖ್ಯವಿರುವಾಗ ನಾವು ಸಾಮಾನ್ಯಕ್ಕಿಂತಲೂ ಕಡಿಮೆ ಆಹಾರವನ್ನು ಸೇವಿಸುತ್ತಿರುತ್ತೇವೆ. ಎಚ್‌ಐವಿ/ಏಡ್ಸ್‌ ನಲ್ಲಿ ಪೋಷಣಾ ಆರೈಕೆಯ ಸಾಮಾನ್ಯ ತತ್ವಗಳು 1. ಸಹಜ ದೇಹ ತೂಕವನ್ನು ಕಾಪಾಡಿಕೊಳ್ಳಿ. ನೀವು ಸೇವಿಸಬಹುದಾದ, ನಿಮಗೆ ಅಗತ್ಯರುವ ಕ್ಯಾಲೊರಿಯ ಬಗ್ಗೆ ಎಚ್ಚರವಿರಲಿ ಮತ್ತು ಸಹಜ ತೂಕವನ್ನು ಕಾಪಾಡಿಕೊಳ್ಳಿ. 2. ಸ್ನಾಯುಗಳನ್ನು ಬೆಳೆಸಿ/ದೇಹ ಸಾಂದ್ರತೆಯನ್ನು ಕಾಪಾಡಿಕೊಳ್ಳಿ. ದೇಹದ ಮಾಂಸಖಂಡಗಳನ್ನು ಬೆಳೆಸಲು ತರಬೇತಿಯನ್ನು ಪಡೆದುಕೊಳ್ಳಿ, ಆವಶ್ಯಕವೆನಿಸಿದರೆ, ಸ್ನಾಯುಗಳನ್ನು ಬೆಳೆಸಲು ಸ್ಟೀರಾಯ್ಡ ಅಥವಾ ಹಾರ್ಮೋನ್‌ಗಳನ್ನು ತೆಗೆದುಕೊಳ್ಳಬಹುದು. 3. ಜೀರ್ಣಶಕ್ತಿಯು ಚೆನ್ನಾಗಿರಲಿ. ಜೀರ್ಣಾಂಗವ್ಯೂಹವು ನಿಮ್ಮ ಆರೋಗ್ಯದ ಮೂಲ - ಸರಳ ನಿಯಮಗಳ ಮೂಲಕ, ಅಂದರೆ ನಿಮ್ಮ ಆಹಾರವನ್ನು ಚೆನ್ನಾಗಿ ಜಗಿದು ಸೇವಿಸುವುದರಿಂದ ಜೀರ್ಣಾಂಗವ್ಯೂಹದ ಕೆಲಸ ಬಹಳ ಸರಾಗವಾಗುತ್ತದೆ! 1-3 ದೊಡ್ಡ ಊಟಕ್ಕಿಂತ 4-6 ಸಲ ಸಣ್ಣ ಸಣ್ಣ ಊಟಗಳನ್ನು ಸೇವಿಸುವುದು ಹೆಚ್ಚು ಪ್ರಯೋಜನಕಾರಿ. 4. ಹೆಚ್ಚು ಹೆಚ್ಚು ಉಪಶಮನಕಾರಿ ಆಹಾರಗಳನ್ನು ಸೇವಿಸಿ; ಸಂಸ್ಕರಿಸಿದ ಆಹಾರಗಳನ್ನು ಕಡಿಮೆ ಸೇವಿಸಿ. 5. ನಿತ್ಯವೂ 6-10 ಕಪ್‌ ಗಳಷ್ಟು ಕೆಫೀನ್‌ ರಹಿತ ಪಾನೀಯವನ್ನು ಸೇವಿಸಿ. 6. ಅಗತ್ಯಕ್ಕೆ ಅನುಗುಣವಾಗಿ ಪೂರಣಗಳನ್ನು ತೆಗೆದುಕೊಳ್ಳಿ. 7. ಸಾಮಾಜಿಕ ಮತ್ತು ಭಾವನಾತ್ಮಕ ಪ್ರತ್ಯೇಕತೆಯನ್ನು ಬಗೆಹರಿಸಿಕೊಳ್ಳಿ. ಯಾಕೆಂದರೆ, ಈ ಅಂಶಗಳು ನಿಮ್ಮ ಆಹಾರ ಆಯ್ಕೆಯ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತವೆ. ಆಹಾರ ನಿರ್ವಹಣೆ ಹಣ್ಣುಗಳು ಮತ್ತು ತರಕಾರಿಗಳು: ಹಣ್ಣು ಮತ್ತು ತರಕಾರಿಗಳಲ್ಲಿ ವಿಟಾಮಿನ್‌ಗಳು, ಖನಿಜಗಳು ಮತ್ತು ಆಂಟಿ ಆಕ್ಸಿಡಾಂಟ್‌ಗಳು ಹೇರಳವಾಗಿರುತ್ತವೆ. ಈ ಅಂಶಗಳು ಸೋಂಕು ಮತ್ತು ಕಾಯಿಲೆಗಳ ವಿರುದ್ಧ ಹೋರಾಡುವ ದೇಹದ ಸಾಮರ್ಥ್ಯವನ್ನು ಹೆಚ್ಚಿಸುತ್ತವೆ. ದಿನದಲ್ಲಿ ಐದರಿಂದ ಆರು ಸರ್ವಿಂಗ್ಸ್‌ ಗಳಷ್ಟು ಅಥವಾ 3 ಕಪ್‌ಗ್ಳಷ್ಟು ಹಣ್ಣುಗಳು ಮತ್ತು ತರಕಾರಿಗಳನ್ನು ಸೇವಿಸಿ. ತಾಜಾ, ಮತ್ತು ಬಣ್ಣ ಬಣ್ಣದ ವೈವಿಧ್ಯಮಯ ಬಣ್ಣದ ಬೆರ್ರಿಗಳನ್ನು, ಸಿಟ್ರಸ್‌ ಹಣ್ಣುಗಳನ್ನು, ಸೇಬುಗಳನ್ನು, ಕೆಂಪು ದ್ರಾಕ್ಷಿಗಳನ್ನು , ಟೊಮ್ಯಾಟೋಗಳನ್ನು, ಸೊಪ್ಪು$ ತರಕಾರಿಗಳನ್ನು, ಬ್ರಾಕಲಿ ಮತ್ತು ಮೊಳಕೆ ಕಟ್ಟಿದ ಆಹಾರಗಳನ್ನು ಸೇವಿಸಿ, ಆಂಟಿ ಆಕ್ಸಿಡಾಂಟ್‌ಗಳ ಗರಿಷ್ಠ ಪ್ರಯೋಜನಗಳನ್ನು ಪಡೆಯಿರಿ. ಅಧಿಕ-ಗುಣಮಟ್ಟದ ಪ್ರೊಟೀನ್‌: ಪ್ರೊಟೀನ್‌ಗಳು ಅಮೈನೋ ಆಸಿಡ್‌ಗಳನ್ನು ಒದಗಿಸುತ್ತವೆ - ಇವು ತೆಳು ಅಂಗಾಂಶಗಳ ಸಂರಚನಾ ಘಟಕಗಳಾಗಿರುತ್ತವೆ. ಪ್ರೊಟೀನ್‌ ಸಮೃದ್ಧ ಆಹಾರಗಳು ದೇಹದ ರೋಗನಿರೋಧಕ ವ್ಯವಸ್ಥೆಯನ್ನು, ಚಲನ ವಲನ ಸಾಮರ್ಥ್ಯವನ್ನು ಮತ್ತು ಅಂಗಾಂಶಗಳ ಪುನರ್ರಚನೆಯನ್ನು ಬಲಪಡಿಸುತ್ತವೆ. ಇಂತಹ ಆಹಾರಗಳು ಅಂದರೆ - ಸಾವಯವ ಮೊಟ್ಟೆಗಳು, ತೆಳು ಮಾಂಸ, ಸೋಯಾ ಮತ್ತು ಹಾಲಿನ ಉತ್ಪನ್ನಗಳು... ಇತ್ಯಾದಿ. ಏಎಚ್‌ಐವಿ/ಏಡ್ಸ್‌ ಚಿಕಿತ್ಸೆಯ ಅಡ್ಡ ಪರಿಣಾಮವಾಗಿ ಉಂಟಾಗುವ ಸ್ನಾಯು ಅಂಗಾಂಶಗಳ ಕುಸಿತ ಮತ್ತು ತೂಕ ಇಳಿಕೆಯಂತಹ ತೊಂದರೆಗಳನ್ನು ತಪ್ಪಿಸಲು ಪ್ರೊಟೀನ್‌ಯುಕ್ತ ಆಹಾರ ಗಳು ಉಪಯುಕ್ತ. ಪ್ರೊಟೀನ್‌ ಸಮೃ ದ್ಧಿತ ಆಹಾರಗಳೆಂದರೆ, ಸ್ಕಿನ್‌ ಲೆಸ್‌ ಚಿಕನ್‌ ಅಥವಾ ಟರ್ಕಿ ಬ್ರೆಸ್ಟ್‌, ಮೊಟ್ಟೆ ಅಥವಾ ತರಕಾರಿಯ ಆಮ್ಲೆಟ್‌ಗಳು, ಟೋಫ‌ು, ಗ್ರಿಲ್‌ ಮಾಡಿದ ಮೀನು ಅಥವಾ ಕಡಿಮೆ ಕೊಬ್ಬಿನ ಹಾಲು, ಯೋಗರ್ಟ್‌, ಕಾಟೇಜ್‌ ಚೀಸ್‌ ಇತ್ಯಾದಿ. ಇಡೀ ಧಾನ್ಯಗಳು ಇಡೀ ಧಾನ್ಯಗಳು ಎಚ್‌ಐವಿ/ಏಡ್ಸ್‌ ರೋಗಿಗಳಿಗೆ ಆವಶ್ಯಕವಿರುವ ಕಬ್ಬಿಣ ಇತ್ಯಾದಿ ಪೋಷಕಾಂಶಗಳ ಮತ್ತು ನಾರಿನ ಉತ್ತಮ ಮೂಲಗಳಾಗಿವೆ. ಅಂದರೆ, ಸಮೃದ್ಧಗೊಳಿಸಿದ ಬ್ರೆಡ್‌ಗಳು, ಉಪಾಹಾರಗಳು ಮತ್ತು ಸಂಕೀರ್ಣ ಮೂಲಗಳು ಅಂದರೆ ಇಡೀ ಧಾನ್ಯಗಳು. ಉತ್ತಮ ಫ‌ಲಿತಾಂಶವನ್ನು ಪಡೆಯಲು ವೈವಿಧ್ಯಮಯ ಇಡಿ ಧಾನ್ಯಗಳನ್ನು ಅಂದರೆ ಓಟ್ಸ್‌, ಇಡೀ ಗೋಧಿ, ವೈಲ್ಡ್‌ ರೈಸ್‌, ಕುಚ್ಚಲಕ್ಕಿ, ಬಾರ್ಲಿ ಮತ್ತು ಜೋಳ ಇವುಗಳನ್ನು ನಿಮ್ಮ ನಿತ್ಯದ ಆಹಾರದಲ್ಲಿ ನಿಯಮಿತವಾಗಿ ಉಪಯೋಗಿಸಿ. ಇಡಿಯ ಧಾನ್ಯಗಳ ಆಹಾರಗಳನ್ನು ಕೊಳ್ಳುವಾಗ, ಅದರಲ್ಲಿ ಪ್ರಧಾನ ಧಾನ್ಯವಾಗಿ ಇಡಿಯ ಧಾನ್ಯಗಳನ್ನೇ ಉಪಯೋಗಿಸಲಾಗಿದೆ ಎಂಬುದನ್ನು ಖಚಿತಪಡಿಸಿಕೊಳ್ಳಿ. ಆರೋಗ್ಯಕರ ಕೊಬ್ಬುಗಳು ಆಹಾರದಲ್ಲಿರುವ ಕೊಬ್ಬುಗಳು, ವಿಟಾಮಿನ್‌ ಕೆ ಮತ್ತು ಇ ಇತ್ಯಾದಿ ಕೆಲವು ಪೋಷಕಾಂಶಗಳನ್ನು ಹೀರಿಕೊಳ್ಳಲು ಸಹಾಯ ಮಾಡುತ್ತವೆ, ಮಾತ್ರವಲ್ಲ ಇವು ಆಹಾರದ ಸಾಂದ್ರತೆ, ತಲೆಗೂದಲು ಮತ್ತು ಚರ್ಮದ ಆರೋಗ್ಯ ಮತ್ತು ಮೆದುಳಿನ ಚಟುವಟಿಕೆಯನ್ನು ಉತ್ತಮಗೊಳಿಸುತ್ತವೆ. ದಿನದಲ್ಲಿ ಕನಿಷ್ಠ ಒಂದು ಬಾರಿಯಾದರೂ ಆರೋಗ್ಯಕರ ಕೊಬ್ಬಿನ ಮೂಲಗಳಾದ ಬೀಜಗಳು ಅಥವಾ ಕಾಳುಗಳನ್ನು ಸೇವಿಸಿ. ಹೆಚ್ಚಾಗಿ ಆರೋಗ್ಯಕರವಾದ ಕೊಬ್ಬಿನ ಮೂಲಗಳನ್ನು ಆರಿಸಿಕೊಳ್ಳಿ, ಅಂದರೆ ಆಲಿವ್‌ ಎಣ್ಣೆ, ರಿಫೈನ್‌x ಎಣ್ಣೆ, ಕುಂಬಳ ಕಾಯಿ ಬೀಜಗಳು, ಸೂರ್ಯಕಾಂತಿ ಬೀಜಗಳು, ವಾಲ್‌ ನಟ್‌ ಗಳು, ಬಾದಾಮಿಗಳು, ಬಟಾಣಿಗಳು, ಅವೊಕ್ಯಾಡೋ ಮತ್ತು ಕೊಬ್ಬಿನ ಮೀನುಗಳಾದ ಸಾಲ್ಮನ್‌, ಟ್ಯೂನಾ ಮತ್ತು ಸಾರ್ಡಿನ್‌ಗಳು ಇತ್ಯಾದಿ. ಒಂದು ಉತ್ತಮ ಆಹಾರ ಯೋಜನೆಯ ಜೊತೆ ಜೊತೆಗೆಯೇ ತಾಳುವಿಕೆಯ ವ್ಯಾಯಾಮಗಳನ್ನೂ ಸಹ ರೂಢಿಸಿಕೊಳ್ಳಬೇಕು. ಸ್ನಾಯು ಗಳ ಬೆಳವಣಿಗೆ ಮತ್ತು ದೇಹದ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳಲು ಲಘುವಾಗಿ ಭಾರ ಎತ್ತುವ ವ್ಯಾಯಾ ಮಗಳು ಮತ್ತು ಏರೋಬಿಕ್‌ ವ್ಯಾಯಾಮಗಳಾದ ನಡಿಗೆ, ಈಜು ವುದು, ನೃತ್ಯ - ಹೀಗೆ ನಿಮ್ಮ ಹೃದಯದ ಗತಿಯು ಮಾಮೂಲಿಗಿಂತ ಸ್ವಲ್ಪ$ ವೇಗವಾಗಿ ಹೊಡೆದುಕೊಳ್ಳುವಂತೆ ಮಾಡುವ ಯಾವುದಾದರೂ ರೀತಿಯ ವ್ಯಾಯಾಮಗಳನ್ನು ರೂಢಿಸಿಕೊಳ್ಳಿ. ಎಚ್‌ಐವಿ/ಏಡ್ಸ್‌ ಇರುವ ಒಬ್ಬ ವ್ಯಕ್ತಿಯು ದೇಹವನ್ನು ಸದೃಢಗೊಳಿಸಿಕೊಂಡು, ಆಂಟಿರಿಟ್ರೋವೈರಲ್‌ ಔಷಧಿಗಳನ್ನು ಉಪಯೋಗಿಸಿಕೊಂಡು, ವೈರಸ್‌ ನ ವೇಗಕ್ಕೆ ತಡೆಹಾಕಿ, ಯಶಸ್ವೀ ಜೀವನವನ್ನು ಸಾಗಿಸಬಹುದು.