ಕಂಕಣಬಲ ಕೂಡಿ ಬರಲು ಏನು ಮಾಡಬೇಕು?

ಪ್ರತಿಯೊಬ್ಬ ವ್ಯಕ್ತಿಯ ಜೀವನದಲ್ಲಿ ದೊಡ್ಡ ಟರ್ನಿಂಗ್ ಪಾಯಿಂಟ್ ಎಂದರೆ ಮದುವೆ. ಏಕೆಂದರೆ ವಿವಾಹದ ನಂತರ ಕೆಲವರು ಜೀವನದಲ್ಲಿ ಸಿರಿ, ಸುಖ, ಸಂಪತ್ತು ಕಂಡರೆ, ಕೆಲವರು ಕಾರಾಗೃಹವಾಸಿಗಳು ಸಹ ಆಗಿದ್ದಾರೆ. ವ್ಯಕ್ತಿಯ ಜನ್ಮ ಕುಂಡಲಿಯಲ್ಲಿ 7ನೇ ಮನೆಯ ವಿವಾಹದ ಸ್ಥಾನ. 2ನೇ ಮನೆಯ ಕುಟುಂಬ ಸ್ಥಾನ, 4ನೇ ಮನೆ ಸುಖದ ಸ್ಥಾನ, 9ನೇ ಮನೆ ಭಾಗ್ಯದ ಸ್ಥಾನ, 11ನೇ ಮನೆ ಲಾಭ ಸ್ಥಾನವಾಗಿರುತ್ತದೆ. ಹೀಗಾಗಿ 7ರ ಜತೆ ಈ ಎಲ್ಲ ಮನೆಗಳಲ್ಲಿರುವ ಗ್ರಹ, ಅದರ ಅಧಿಪತಿಗಳು, ಅವರ ಮೇಲಿರುವ ಇತರೆ ಗ್ರಹಗಳ ದೃಷ್ಟಿ, ಸಂಬಂಧ, ಉಂಟಾಗುವ ಯೋಗಗಳು ಇತ್ಯಾದಿಗಳನ್ನೆಲ್ಲ ಪರಿಶೀಲಿಸಬೇಕಾಗುತ್ತದೆ. ಜನ್ಮ ಕುಂಡಲಿಯಲ್ಲಿ ಸಪ್ತಮ ಸ್ಥಾನದಲ್ಲಿ ರವ್ಯಾದಿಗ್ರಹಗಳಿದ್ದರೆ, ರವಿ : ಬಲಿಷ್ಠನಾಗಿದ್ದರೆ ಸರಕಾರಿ ನೌಕರಿ ಇಲ್ಲವೆ ರಾಜಕೀಯ ಸಂಘ-ಸಂಸ್ಥೆಗಳಲ್ಲಿ ದೊಡ್ಡ ಕೆಲಸದಲ್ಲಿರುವ ಸಂಗಾತಿ. ಏಕಪತ್ನಿ; ಪೀಡಿತನಾಗಿದ್ದರೆ ಅನೇಕ ಜನ ಪತ್ನಿಯರು, ವಯಸ್ಸಾದ ಮೇಲೆ ವಿವಾಹ, ಅನ್ಯ ಸ್ತ್ರೀ ಆಸಕ್ತ, ಸ್ತ್ರೀ ವಿಯೋಗ, ಸ್ತ್ರೀ ದ್ವೇಷಿ, ಸ್ತ್ರೀಯರಿಂದ ದ್ವೇಷಿಸಲ್ಪಡುವ, ಕೋಪಿಷ್ಠ-ದರ್ಪ-ದುರಹಂಕಾರದ ಪತ್ನಿ, ತಂದೆ ಕಡೆ ಸಂಬಂಧದಲ್ಲಿ ವಿವಾಹ, ವಿವಾಹಕ್ಕೆ ಅನೇಕ ತೊಡರುಗಳು. ಚಂದ್ರ : ಬಲಿಷ್ಠನಾಗಿದ್ದರೆ ಸುಂದರಿ, ದ್ವಿಭಾರ್ಯ, ಪತ್ನಿಯಿಂದ ಭಾರಿ ಸುಖ, ಉತ್ತಮ ಯುವತಿಯ ಪತಿ, ಅತಿಕಾಮಿ, ಮೃದು ಪತ್ನಿ, ಪತ್ನಿ ಹೋಟೆಲ್, ಬಟ್ಟೆ, ರಸ ಪದಾರ್ಥ, ಸುಗಂಧ ದ್ರವ್ಯದ ವ್ಯಾಪಾರಿ, ಕ್ಷೀಣ ಚಂದ್ರನಿದ್ದರೆ ವಿಧುರ, ತಾಯಿ ಕಡೆ ಸಂಬಂಧದಲ್ಲಿ ವಿವಾಹ, ಕುಜ : ಕುಜ ದೋಷ ಬಲಾಢ್ಯವಾಗಿದ್ದರೆ ಪತ್ನಿಗೆ ಶೀಘ್ರ ಮರಣ. ಪತ್ನಿ ಗಂಡುಬೀರಿ. ಅನ್ಯರ ಸಂಗ, ಒಂದಕ್ಕಿಂತ ಹೆಚ್ಚು ವಿವಾಹ. ಸ್ತ್ರೀಯರಿಂದ ತಿರಸ್ಕಾರ. ವಿವಾಹಕ್ಕೆ ಅನೇಕ ವಿಘ್ನಗಳು. ಸಂತಾನಕ್ಕೂ ತೊಂದರೆ. ಪತ್ನಿಗೂ ಇದೇ ರೀತಿ ಕುಜ ದೋಷವಿದ್ದರೆ ದೋಷವಿಲ್ಲ. ಸೋದರ-ಸೋದರಿ ಕಡೆ ಸಂಬಂಧದಲ್ಲಿ ವಿವಾಹ. ಪತ್ನಿಗೆ ಭೂಮಿ, ವಿದ್ಯುತ್, ಆಸ್ಪತ್ರೆಯಲ್ಲಿ ಕೆಲಸ. ಬುಧ : ಪಂಡಿತೆ, ಇಷ್ಟ ಪಡುವ ಪತ್ನಿ, ಸುಂದರ ಅಲಂಕಾರಿಕ ವಸ್ತ್ರ ಆಭರಣ ಪ್ರಿಯ. ಪತ್ರಿಕೆ, ನ್ಯಾಯಾಲಯದಲ್ಲಿ ಕೆಲಸ. ಬೋಧಕರೂ ವೈದ್ಯರೂ ಆಗಿರಬಹುದು. ಪಾಪಗ್ರಹದ ಜತೆ ಇದ್ದರೆ ಪತ್ನಿ ನಾಶ, ಪತ್ನಿಗೆ ಅನ್ಯರ ಸಂಬಂಧ. ಗುರು : ಪತಿವ್ರತಾ ಪತ್ನಿ. ಪತ್ನಿಯಿಂದ ಲಾಭ. ಪತ್ನಿಗೆ ಶಿಕ್ಷಣ ಸಂಸ್ಥೆಯಲ್ಲಿ ಕೆಲಸ. ಇಲ್ಲವೆ ಇತರರಿಗೆ ಮಾರ್ಗದರ್ಶಕಳು. ದೇವರು-ಗುರು-ಹಿರಿಯರಲ್ಲಿ ಭಕ್ತಿಯುಳ್ಳ ಪತ್ನಿ. ಉತ್ತಮ ಸಂತಾನ, ಉದಾರಿ. ಗುರು ಪೀಡಿತನಾಗಿದ್ದರೆ ಮೇಲೆ ತಿಳಿಸಿದ ಫಲಗಳಲ್ಲಿ ವ್ಯತ್ಯಾಸವುಂಟು. ಶುಕ್ರ : ಶ್ರೀಮಂತೆ, ಅತಿಕಾಮಿ, ಶುಕ್ರ ಬಲಿಷ್ಠನಾಗಿದ್ದರೆ ಪತ್ನಿಯು ಖ್ಯಾತ ಕಲಾವಿದೆ ಇಲ್ಲವೆ ಹಣಕಾಸಿನ ರಂಗದಲ್ಲಿ ಉನ್ನತ ಹುದ್ದೆ, ಪತ್ನಿ ಮೂಲಕ ಭಾರಿ ಧನ ಸಂಗ್ರಹ, ಉತ್ತಮ ಪತ್ನಿ, ಪೀಡಿತನಾಗಿದ್ದರೆ ಹೀನ ಸ್ತ್ರೀ ಸಂಗ, ಪತ್ನಿ ಬಡವಿ, ಪತ್ನಿಗೆ ಮರಣ, ಕೆಳವರ್ಗದ ಕಲಾವಿದೆ. ಶನಿ : ವಯಸ್ಸಾದ, ತೆಳ್ಳನೆಯ, ಕಪ್ಪನೆಯ, ಕುರೂಪಿ, ಕ್ರೂರ ಪತ್ನಿ, ಕೆಳವರ್ಗದ ಕೆಲಸದಲ್ಲಿರುವವಳು, ಸ್ತ್ರೀಯರಿಂದ ತಿರಸ್ಕಾರ, ಅನೇಕ ಸ್ತ್ರೀ ಸಂಗ. ವಿವಾಹಕ್ಕೆ ಅಡೆತಡೆ, ತಡವಾದ ವಿವಾಹ. ರಾಹು : ವಿಧುರ ಪ್ರಿಯೆ, ಅಸುಖಿ, ಪತ್ನಿಗೆ ಋತಸ್ರಾವದ ತೊಂದರೆ, ಪತ್ನಿ ಅತಿ ಬುದ್ಧಿವಂತೆ, ಪರದೇಶ ವಾಸಿ, ಅನ್ಯ ಜಾತಿ ಪತ್ನಿಯಾಗಿರಲೂ ಸಾಧ್ಯ. ಕೇತು : ಅನ್ಯ ಜಾತಿ ವಿವಾಹ, ವಿವಾಹಕ್ಕೆ ಭಾರೀ ಅಡೆತಡೆ, ಬಹುತೇಕ ವಿವಾಹ ದುರಂತ (ಪತ್ನಿ ವಿಚ್ಚೇದನ ಅಥವಾ ಮರಣ) ದುಷ್ಟ ಪತ್ನಿ, ಹೀನ ಸ್ತ್ರೀಯರಲ್ಲಿ ಆಸಕ್ತಿ, ವಿವಾಹದ ಸಂಬಂಧ ಹೆಚ್ಚು ಗಲಾಟೆ, ಮಾನ ಹಾನಿ, ಸಂಗಾತಿಗೆ ಕಂಪ್ಯೂಟರ್, ಮ್ಯಾಜಿಕ್, ಮಾಟ ವಿದ್ಯೆ ಒಲಿಯುತ್ತದೆ.