ಲಗ್ನದಲ್ಲಿರುವುದು ಸೌಂದರ್ಯ

ನೀವು ಸುಂದರರೇ? ನಿಮ್ಮ ಆಕೃತಿ, ಹಲ್ಲು, ಸೊಂಟ, ಇವ್ಯಾವುವಾದರೂ ನಿಮ್ಮನ್ನು ಕುರೂಪಿಗಳಾಗಿ ಕಾಣುವಂತೆ ಮಾಡುತ್ತಿದೆಯೇ? ಪರವಾಗಿಲ್ಲ ಚಿಂತಿಸದಿರಿ. ನಿಮ್ಮ ಲಗ್ನಕ್ಕನುಗುಣವಾಗಿ ರೂಪ ಇರುತ್ತದೆ. ನಿಮ್ಮ ಲಗ್ನವನ್ನು ನೋಡುವ, ಸ್ಥಿತವಾಗಿರುವ ಗ್ರಹಗಳಿಗನುಗುಣವಾಗಿ ನಿಮ್ಮ ರೂಪ ಇರುತ್ತದೆ. ಈ ಕೆಳಗೆ ರೂಪಕ್ಕೆ ತಕ್ಕ ಸಲಹೆಗಳನ್ನು ಕೊಡಲಾಗಿದೆ. ಮೇಷ: ಅಗಲವಾದ ದೊಡ್ಡದಾದ ಹಣೆ ಇರುತ್ತದೆ. ತಲೆಕೂದಲನ್ನು ಹಿಂದಕ್ಕೆ ಬಾಚಿದಲ್ಲಿ ನಿಮ್ಮ ಬುದ್ಧಿವಂತಿಕೆ ಹಾಗೂ ನಿಮ್ಮ ವ್ಯಕ್ತಿತ್ವವನ್ನು ಎತ್ತಿ ತೋರಿಸುತ್ತದೆ. ನಿಮ್ಮ ಗದ್ದ ಚಿಕ್ಕದಾಗಿರುವುದರಿಂದ ಮುಖಕ್ಕೆ ಪೌಡರ್ ಹಾಗೂ ಫೌಂಡೇಷನ್ ಕ್ರೀಮ್ ನಿಂದ ಅದನ್ನು ದೊಡ್ಡದಾಗಿ ಕಾಣಿಸುವಂತೆ ಮಾಡಿಕೊಳ್ಳಿ. ವೃಷಭ: ನಿಮ್ಮ ಗಂಟಲು ಹೊರಗೆ ಬಂದಂತೆ ಕಾಣಿಸುತ್ತದೆ. ಅದು ಹಂಸದಂತೆ ಉದ್ದವಾಗಿರುತ್ತದೆ. ಹಾಗಾಗಿ ಕತ್ತಿಗೆ ಆಭರಣಗಳನ್ನು ಉಪಯೋಗಿಸಿದಲ್ಲಿ ಕತ್ತು ಸುಂದರವಾಗಿ ಕಾಣುತ್ತದೆ. ಮಿಥುನ: ಕೈಕಾಲುಗಳು ತೆಳ್ಳಗೆ ಉದ್ದವಾಗಿರುತ್ತವೆ. ಬೆರಳುಗಳು ಹಾಗೂ ಉಗುರುಗಳು ಚೆನ್ನಾಗಿ ರೂಪುಗೊಂಡಿರುತ್ತವೆ. ಒಳ್ಳೆಯ ಕಂಪನಿಯ ಉಗುರುಬಣ್ಣವನ್ನು ಹಚ್ಚಬೇಕು. ಕಾಲ್ಬೆರಳಿಗೆ ಉಂಗುರಗಳನ್ನು ಹಾಕಿಕೊಳ್ಳುವುದು, ಗೆಜ್ಜೆಗಳನ್ನು ಹಾಕಿಕೊಂಡಲ್ಲಿ ಕೈಕಾಲುಗಳು ಸುಂದರವಾಗಿ ಕಾಣುತ್ತದೆ. ಕಟಕ: ಸೊಂಟ ಚೆನಾಗಿರುತ್ತದೆ. ಹೀಗಾಗಿ ಅದನ್ನು ಹಾಗೇ ಕಾಪಾಡಿಕೊಳ್ಳಿ. ಯದ್ವಾತದ್ವಾ ತಿಂದು ಸೊಂಟದ ಆಕಾರವನ್ನು ಕೆಡಿಸಿಕೊಳ್ಳಬೇಡಿ. ಸಿಂಹ: ತೆಳ್ಳಗಿದ್ದು ರಾಜ ಗಾಂಭೀರ್ಯವಿರುತ್ತದೆ. ನೀವು ನಿಮಗೆ ಮನಕ್ಕೆ ಇಷ್ಟವಾದುದನ್ನು ತಿನ್ನಿ. ನಿಮ್ಮ ಲಗ್ನಕ್ಕನುಗುಣವಾಗಿ ದಪ್ಪವಾಗುವ ಭಯ ಬಿಡಿ. ಬೇರೆ ಲಗ್ನದವರಿಗಿಂತ ನಿಮಗೆ ಬೇಗ ಸುಕ್ಕು ಬರುತ್ತದೆ. ಹಾಗಾಗಿ ನಿಮ್ಮ ಚರ್ಮ ಸುಕ್ಕಾಗುವುದನ್ನು ತಡೆಗಟ್ಟುವುದರ ಬಗ್ಗೆ ಯೋಚಿಸಿ. ಹಾಲಿನ ಕೆನೆ ಹಚ್ಚಿಕೊಂಡು ಚರ್ಮ ನುಣುಪಾಗಿರುವಂತೆ ನೋಡಿಕೊಳ್ಳಿ. ಕನ್ಯಾ: ಮುಖವೇ ನಿಮಗೆ ಅದೃಷ್ಟವನ್ನು ತಂದುಕೊಡುವಂತಿರುತ್ತದೆ. ದೊಡ್ಡ ಕಣ್ಣುಗಳು, ಆದರ್ಶ ಹಣೆ, ದಟ್ಟವಾದ ಕೂದಲು, ಸುಂದರ ದಂತಪಂಕ್ತಿ ಇವು ನಿಮ್ಮ ಆಸ್ತಿ. ಬುಧ ಅಧಿಪತಿಯಾಗಿರುವುದರಿಂದ ನುಣುಪಾದ ಮೂಗುಳ್ಳವರಾಗಿದ್ದು ದೇಹದ ಸ್ನಾಯುಗಳು ಸಂಕುಚಿತವಾಗುವ ಸಂಭವವಿರುವುದರಿಂದ ಅದನ್ನು ತಡೆಯುವಂತೆ ನೋಡಿಕೊಳ್ಳಬೇಕು. ತುಲಾ: ಅಂಡಾಕಾರದ ಮುಖ ಹಾಗೂ ಮುಖಾಕೃತಿ ಬಹಳ ಆಕರ್ಷಣೀಯ. ನೀವು ಮೇಕಪ್ ಮಾಡಿಕೊಳ್ಳುವುದರಲ್ಲಿ ನಿಸ್ಸೀಮರು. ನಿಮ್ಮ ಚರ್ಮ ಸಂರಕ್ಷಣೆಯನ್ನು ಮಾಡಿಕೊಳ್ಳುವುದು ಉತ್ತಮ. ಏಕೆಂದರೆ ಚರ್ಮದ ಮೇಲೆ ಚಿಕ್ಕ ಚಿಕ್ಕ ಗುರುತು ಅಥವಾ ಕಲೆಗಳು ಕಂಡುಬರುವುವು. ಇದಕ್ಕಾಗಿ ಹೆಚ್ಚು ನಾರಿನಂಶವುಳ್ಳ ಪದಾರ್ಥಗಳನ್ನೇ ತಿನ್ನಿ. ಚೆನ್ನಾಗಿ ನೀರು ಕುಡಿಯಿರಿ. ಹಣ್ಣಿನ ರಸ ಹಾಗೂ ತರಕಾರಿ ರಸವನ್ನು ಜಾಸ್ತಿ ಉಪಯೋಗಿಸಿರಿ. ಕಾಫಿ, ಟೀ ಕುಡಿಯುವುದನ್ನು ಬಿಡುವುದು ಒಳ್ಳೆಯದು. ವೃಶ್ಚಿಕ: ಗುಪ್ತ ಲಗ್ನದವರಾಗಿರುವ ನಿಮ್ಮ ಕಣ್ಣುಗಳು ಆಳವಾದ ನಿಗೂಢ ಕೊಳಗಳಂತಿರುತ್ತವೆ. ನೀವು ಬಹಳ ಜಾಗರೂಕತೆಯಿಂದ ಮೇಕಪ್ ಮಾಡಿಕೊಳ್ಳಬೇಕು. ನಿಮ್ಮದು ಜಲತತ್ತ್ವರಾಶಿಯಾಗಿರುವುದರಿಂದ ಸೊಂಟವನ್ನು ಗಮನಿಸಿಕೊಳ್ಳುತ್ತಿರಬೇಕು. ಹಾಗಾಗಿ ಐಸ್ಕ್ರೀಮ್, ಕೇಕ್, ಸಿಹಿ ಪದಾರ್ಥಗಳಿಂದ ದೂರವಿರಿ. ತುಂಬಾ ಬೆವರುವುದರಿಂದ ದಿನಕ್ಕೆರಡುಬಾರಿ ಸ್ನಾನ ಮಾಡಿ ಸ್ವಚ್ಛವಾಗಿರಿ. ಧನು: ಲಗ್ನಕ್ಕೆ ಗುರು ಅಧಿಪತಿಯಾಗಿರುವುದರಿಂದ ನಿಮ್ಮದು ಅಗಲವಾದ ಶರೀರ. ಹಾಗಾಗಿ ನೀವು ಉಡುಗೆತೊಡಿಗೆಯಲ್ಲಿ ಜಾಗರೂಕರಾಗಿರಿ. ತಿಳಿ ಬಣ್ಣವನ್ನು ಉಪಯೋಗಿಸಿ. ನಿಮ್ಮದು ಸ್ನೇಹಯುತವಾದ ಮುಖಭಾವ. ಹಾಗಾಗಿ ನಿಮಗೆ ಸಾಕಷ್ಟು ಸ್ನೇಹಿತರು ಇರುತ್ತಾರೆ. ಆಯ್ಕೆಯಲ್ಲಿ ಹುಷಾರಾಗಿರಿ. ನಿಮ್ಮ ಸೊಂಟ ದಪ್ಪಗಾಗುತ್ತಾ ಹೋಗುತ್ತದೆ. ಡುಮ್ಮಗಾಗುವುದರಿಂದ ಎಚ್ಚರವಾಗಿರಿ. ಮಕರ: ನಿಮ್ಮ ಚರ್ಮ ಒಣಗಿದಂತೆ ಇರುತ್ತದೆ. ಹಾಗಾಗಿ ಚರ್ಮವನ್ನು ಮೃದು ಮಾಡಲು ಒಳ್ಳೆಯ ಕೋಲ್ಡ್ ಕ್ರೀಮ್ ಬಳಸುವುದು ಒಳ್ಳೆಯದು. ತಾಜಾ ಹಣ್ಣಿನ ರಸ ಹಾಗೂ ತಾಜಾ ಸೊಪ್ಪು ಸೇವಿಸಿ. ನಿಮ್ಮ ಕೆನ್ನೆ ಒಳಗೆ ಹೋದಂತಿರುವುದರಿಂದ ಮೇಕಪ್ ಮಾಡಿ ಅದು ತುಂಬಿದಂತೆ ಕಾಣುವಂತೆ ನೋಡಿಕೊಳ್ಳಿ. ಕುಂಭ: ಚರ್ಮ ಹೊಳಪಿನಿಂದ ಕೂಡಿರುತ್ತದೆ. ಆದರೆ ನಿಮ್ಮದು ಯಾವಾಗಲೂ ದು:ಖಿತ ಮುಖ. ಯಾವಾಗಲೂ ನಗುನಗುತ್ತಾ ಇರುವಂತೆ ನೋಡಿಕೊಳ್ಳಿ. ಮುಖದ ಸ್ನಾಯುಗಳು ಜೋತು ಬೀಳದಂತೆ ಎಚ್ಚರವಹಿಸಿ. ಬೆನ್ನು ಬಾಗಿರುತ್ತದೆ. ಹಾಗಾಗಿ ಯೋಗಾಸನವನ್ನು ಪ್ರತಿದಿನ ಮಾಡಿ ಬೆನ್ನು ನೆಟ್ಟಗಿರುವಂತೆ ನೋಡಿಕೊಳ್ಳಿ. ಮೀನ: ಪಾರದರ್ಶಕ ವರ್ಣ. ಆಕರ್ಷಕ ಕಣ್ಣುಗಳು ಮತ್ತು ಕಪ್ಪಾದ ದಟ್ಟವಾದ ಕಣ್ರೆಪ್ಪೆಗಳು. ಮೃದುವಾದ ಚರ್ಮ ನಿಮ್ಮದು. ಮಾಂಸ ತುಂಬಿದಂತಿರುವುದು. ಹಾಗಾಗಿ ನೀವು ನಿತ್ಯ ಯೋಗಾಸನ ಮಾಡಿ ಬೊಜ್ಜಿನಿಂದ ದೂರವಿರಿ. ನಿಮ್ಮದು ಅಗಲವಾದ ಪಾದ. ಹಾಗಾಗಿ ನೀವು ಸರಿಯಾದ ಚಪ್ಪಲಿಗಳನ್ನು ಆರಿಸಿಕೊಳ್ಳಿ. ನೀವು ಸುಂದರವಾಗಿ ಅಂದರೆ ಅಂತರಂಗದಿಂದ ಸುಂದರವಾಗಿ ಕಾಣಬೇಕಾದರೆ ಪ್ರತಿದಿನ ರಾತ್ರಿ 12 ದಿವಸಗಳ ಕಾಲ ಊಟದ ನಂತರ 'ಗಂ ಗಣಾಧಿಪತಯೇ ನಮ:' ಮಂತ್ರಸ್ಮರಣೆಯೊಂದಿಗೆ ಚಿಕ್ಕ ಚಮಚದಷ್ಟು ಜೇನು, ತ್ರಿದಳ ತುಳಸಿ, 3 ಮೆಂತ್ಯ, 1 ಲವಂಗಗಳನ್ನು ಒಟ್ಟಿಗೆ ಸೇವಿಸುವುದು. -ಡಾ. ಅನಸೂಯ ಎಸ್. ರಾಜೀವ್