ಜಾತಕ ಫಲ ತರುವುದು ಭಾಗ್ಯ

ಭಾಗ್ಯಕ್ಕಾಗಿ ಚಿಂತೆ ಮಾಡುವ ಜನರೇ ಇರುವರು. ಭಾಗ್ಯಕ್ಕಾಗಿ ಬಹಳ ಪ್ರಯತ್ನ ಮಾಡುವವರೂ ಇರುತ್ತಾರೆ. ಆದರೆ ಪ್ರಯತ್ನ ಮಾಡದೆ ಭಾಗ್ಯ ಬರುವುದು ಇದೆ. ಇದು ಅವರವರ ಗ್ರಹಗಳಿಂದ ಬರುತ್ತದೆ. ರಾಷ್ಟ್ರದ ಪ್ರಧಾನಿಯ ಜಾತಕದಲ್ಲಿ ಶುಕ್ರ ಮತ್ತು ಶನಿಯ ದೃಷ್ಟಿ ಗುರುವಿನ ಮೇಲೆ ಇರುವುದರಿಂದ ಇವರು ರಾಷ್ಟ್ರದ ಮುಖಂಡರಾದರು. ಸಾಮಾನ್ಯವಾಗಿ ಜಾತಕದಲ್ಲಿ ಲಗ್ನ ಅಥವಾ ಚಂದ್ರನ ನವಮ ಸ್ಥಾನ ಭಾಗ್ಯ ಸ್ಥಾನ. ಇದರಲ್ಲಿ ಬಲಿಷ್ಠವಾಗಿರುವವನ ಭಾವದಿಂದ ಭಾಗ್ಯವನ್ನು ನೋಡಬೇಕು. ಭಾಗ್ಯದ ಅಧಿಪತಿ ಇರುವ ಸ್ಥಾನ, ಭಾಗ್ಯದಲ್ಲಿರುವ ಬಲಿಷ್ಠ ಅಥವಾ ಬಲಹೀನ ಗ್ರಹರು ಇದನ್ನೆಲ್ಲ ನೋಡಿ ಲೆಕ್ಕಾಚಾರ ಮಾಡಬೇಕು. ಭಾಗ್ಯ ಸ್ಥಾನದಲ್ಲಿ ಭಾಗ್ಯಾಧಿಪತಿ ಇದ್ದರೆ ಅಥವಾ ಭಾಗ್ಯ ಸ್ಥಾನವನ್ನು ನೋಡಿದರೆ ಜಾತಕನು ಭಾಗ್ಯ ಫಲ ಪಡೆಯುತ್ತಾನೆ. ತೃತೀಯ ಪಂಚಮ ಅಥವಾ ಲಗ್ನದಲ್ಲಿರುವ ಗ್ರಹರು ಬಲಿಷ್ಠವಾಗಿ ಭಾಗ್ಯ ಭಾವವನ್ನು ಪೂರ್ಣ ದೃಷ್ಟಿಯಿಂದ ನೋಡಿದರೆ ಇಂತಹವರು ಅತಿ ಭಾಗ್ಯವಂತರಾಗುತ್ತಾರೆ. ಗುರುವು ಭಾಗ್ಯ ಭಾವದಲ್ಲಿ ಇದ್ದಾಗ ಜಾತಕನು ಮಂತ್ರಿ ಆಗುತ್ತಾನೆ. ನವಮದ ಗುರುವನ್ನು ಚಂದ್ರನು ನೋಡಿದರೆ ಜಾತಕನು ಭೋಗವಂತನಾಗುತ್ತಾನೆ. ಭಾಗ್ಯದಲ್ಲಿರುವ ಗುರುವನ್ನು ಕುಜನು ನೋಡಿದರೆ ಜಾತಕನಲ್ಲಿ ಬಂಗಾರ ಇರುತ್ತದೆ. ಭಾಗ್ಯದಲ್ಲಿರುವ ಗುರುವನ್ನು ಬುಧನು ನೋಡಿದರೆ ಇವರು ಧನವಂತರಾಗುತ್ತಾರೆ. ನವಮದಲ್ಲಿರುವ ಗುರುವನ್ನು ಶುಕ್ರನು ನೋಡಿದರೆ ಮನೆ, ವಾಹನ ಮತ್ತು ಧನದಿಂದ ಕೂಡಿದವನಾಗುತ್ತಾನೆ. ನವಮದಲ್ಲಿರುವ ಗುರುವನ್ನು ಶನಿ ನೋಡಿದರೆ ಆಸ್ತಿ, ವಾಹನಗಳನ್ನು ಹೊಂದುತ್ತಾನೆ. ಭಾಗ್ಯ ಸ್ಥಾನದಲ್ಲಿರುವ ಗುರುವಿಗೆ ರವಿ, ಕುಜರ ದೃಷ್ಟಿ ಇದ್ದರೆ ಜಾತಕನು ಐಶ್ವರ್ಯ, ಬೆಳ್ಳಿ, ಬಂಗಾರ, ವಾಹನ ಮತ್ತು ಹಲವು ಮಂದಿ ಆಳುಗಳನ್ನು ಹೊಂದುತ್ತಾರೆ. ನಮವದ ಗುರುವಿನ ಮೇಲೆ ರವಿ, ಚಂದ್ರರ ದೃಷ್ಟಿ ಇದ್ದರೆ ಜಾತಕನು ಸಂಪತ್ತು ಗಳಿಸಿ, ಅಭಿವೃದ್ಧಿ ಹೊಂದಿ ತಾಯಿ ತಂದೆಯರ ಭಕ್ತನೂ, ಬಹಳ ಪ್ರಖ್ಯಾತಿಯನ್ನೂ ಹೊಂದುತ್ತಾನೆ. ಭಾಗ್ಯದ ಗುರುವಿನ ಮೇಲೆ ರವಿ ಬುಧರ ದೃಷ್ಟಿ ಇದ್ದರೆ ಭಾಗ್ಯವಂತನೂ, ಸೌಂದರ್ಯವತಿ ಹೆಂಡತಿ, ಆಭರಣ ಎಲ್ಲ ರೀತಿಯಿಂದಲೂ ಸಂಪನ್ನರಾಗುತ್ತಾರೆ. ಲೇಖಕರಾಗುತ್ತಾರೆ, ಬುದ್ಧಿವಂತರಾಗುತ್ತಾರೆ. ಭಾಗ್ಯದ ಗುರುವಿಗೆ ರವಿ ಶುಕ್ರ ದೃಷ್ಟಿ ಇದ್ದರೆ ಇವರು ಸ್ಥಳೀಯ ಸಂಸ್ಥೆಯ ಅಧ್ಯಕ್ಷರಾಗುತ್ತಾರೆ. ಪಂಡಿತರೂ, ಗುಣವಂತರೂ, ಧನವಂತರೂ ಆಗುತ್ತಾರೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಚಂದ್ರ ಕುಜರ ದೃಷ್ಟಿ ಇದ್ದರೆ ಇವರು ಮಂತ್ರಿಯಾಗುತ್ತಾರೆ. ಎಲ್ಲ ರೀತಿಯ ಸುಖ ಪಡೆದು ಭೋಗವಂತರಾಗುತ್ತಾರೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಚಂದ್ರ, ಬುಧನ ದೃಷ್ಟಿ ಇದ್ದರೆ ಮನೆ, ಸುಖ, ಭೋಗವನ್ನು ಹೊಂದಿ ತೇಜಸ್ವಿಯೂ, ಅತಿ ಬುದ್ಧಿವಂತರೂ ಆಗುತ್ತಾರೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಚಂದ್ರ ಶುಕ್ರ ದೃಷ್ಟಿ ಇದ್ದರೆ ಇವರು ಶ್ರೀಮಂತರೂ, ಕಾರ್ಯದಲ್ಲಿ ತಲ್ಲೀನರೂ ಆಗುತ್ತಾರೆ. ಇವರಿಗೆ ಸಂತಾನದ ಕೊರತೆ ಇರುತ್ತದೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಚಂದ್ರ, ಶನಿ ದೃಷ್ಟಿ ಇದ್ದರೆ ಇವರು ದೀರ್ಘಾಯುಷ್ಯವನ್ನು ಹೊಂದುತ್ತಾರೆ. ಪರ ದೇಶದಲ್ಲಿ ಇರುತ್ತಾರೆ. ವಾದ ವಿವಾದ ಪ್ರವೃತ್ತಿಯವರೂ, ಗುಣಹೀನರೂ ಆಗಿರುತ್ತಾರೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಕುಜ ಬುಧರ ದೃಷ್ಟಿ ಇದ್ದರೆ ಇವರು ಉತ್ತಮ ಪಂಡಿತರೂ, ಒಳ್ಳೆಯ ಗುಣವಂತರೂ, ವಿದ್ಯಾವಂತರೂ, ಒಳ್ಳೆಯ ವೇಷಧಾರಿಗಳೂ ಆಗಿರುತ್ತಾರೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಕುಜ ಶುಕ್ರರ ದೃಷ್ಟಿ ಇದ್ದರೆ ಇವರು ಧನವಂತರೂ, ವಿದ್ಯಾವಂತರೂ, ವಿದೇಶವಾಸಿಗಳೂ, ಅತಿ ನಿಪುಣರೂ ಆಗಿರುತ್ತಾರೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಕುಜ ಶನಿ ಇದ್ದರೆ ಇವರು ನೀಚರೂ, ದುರ್ಜನರೂ, ಚಾಡಿಕೋರರೂ ಆಗಿರುತ್ತಾರೆ. ಬೇರೆ ಜನರೊಂದಿಗೆ ಬೆರೆಯುವವರಾಗಿರುತ್ತಾರೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಬುಧ ಶುಕ್ರನ ದೃಷ್ಟಿ ಇದ್ದರೆ ವಿದ್ಯಾವಂತರೂ, ಭಾಗ್ಯವಂತರೂ, ಹೇಳಿದ ವಚನ ಪಾಲಿಸುವವರೂ, ಅತಿ ಸುಶೀಲರೂ ಆಗುತ್ತಾರೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಬುಧ, ಶನಿಯ ದೃಷ್ಟಿ ಇದ್ದರೆ ಇವರು ಭಾಗ್ಯವಂತರೂ, ವಿದ್ಯಾವಂತರೂ, ಶೂರರೂ, ಸುಖವಂತರೂ ಮತ್ತು ವಿನಯಶೀಲತೆ ಉಳ್ಳವರೂ ಆಗುತ್ತಾರೆ. ಭಾಗ್ಯದಲ್ಲಿರುವ ಗುರುವಿನ ಮೇಲೆ ಶುಕ್ರ, ಶನಿಯ ದೃಷ್ಟಿ ಇದ್ದರೆ ರಾಷ್ಟ್ರದ ಮುಖಂಡರೂ, ಧನ ಸಂಪತ್ತು ಉಳ್ಳವರೂ ಆಗುತ್ತಾರೆ. ಭಾಗ್ಯ ಸ್ಥಾನದಲ್ಲಿರುವ ಗುರುವನ್ನು ಭಾಗ್ಯಾಧಿಪತಿ ನೋಡಿದರೆ ಇವರು ಮಂತ್ರಿಯಾಗುತ್ತಾರೆ. ಭಾಗ್ಯ ಸ್ಥಾನದಲ್ಲಿರುವ ಗುರುವಿನ ಮೇಲೆ ಎಲ್ಲ ಗ್ರಹಗಳ ದೃಷ್ಟಿ ಇದ್ದಾಗ ಇವರು ಮಂತ್ರಿಗಳೂ, ಐಶ್ವರ್ಯವಂತರೂ, ಶ್ರೇಷ್ಠ ವ್ಯಕ್ತಿಯೂ ಆಗುತ್ತಾರೆ. ಇವರಿಗೆ ಉತ್ತಮ ರೂಪ, ಗುಣವಂತರೂ, ಧೈರ್ಯವಂತರೂ ಆಗುತ್ತಾರೆ. ಭಾಗ್ಯ ಭಾವದಲ್ಲಿ ಬಲಿಷ್ಠ ಗ್ರಹಗಳು ಇದ್ದರೆ ಜಾತಕನು ಮಂತ್ರಿಯಂತೆ ಇರುವವನೂ ಇವರಲ್ಲಿ ಸ್ಥಿರ ಧನ ಇರುತ್ತದೆ. ಧರ್ಮದಿಂದ ನಡೆಯುತ್ತಾರೆ. ಜನನ ಕಾಲದಲ್ಲಿ ಬಲಿಷ್ಠರಾದ ಕುಜ, ಶನಿ ಮತ್ತು ಬುಧ ಬಲಿಷ್ಠರಾಗಿ ಪೂರ್ಣ ಚಂದ್ರನಿಂದ ಕೂಡಿ ಭಾಗ್ಯ ಸ್ಥಾನದಲ್ಲಿ ಇದ್ದರೆ ಜಾತಕರು ಮಂತ್ರಿಯಾಗುತ್ತಾರೆ. ಭಾಗ್ಯ ಭಾವದಲ್ಲಿರುವ ಉಚ್ಚದ ಗ್ರಹ ಜಾತಕನಿಗೆ ರಾಜ ಪದವಿಯನ್ನು ಕೊಡುತ್ತಾನೆ. ಶತ್ರುಗಳನ್ನು ನಾಶ ಮಾಡುತ್ತಾನೆ. ಉತ್ತಮ ಕೀರ್ತಿವಂತರಾಗುತ್ತಾರೆ. ಗುರು ಮತ್ತು ಶುಕ್ರರು ಭಾಗ್ಯ ಸ್ಥಾನದಲ್ಲಿದ್ದಾಗ ಜನಿಸಿದವರು ರಾಜರಾಗುತ್ತಾರೆ. ದೀರ್ಘಾಯುವೂ ಉತ್ತಮವಾದ ಮಾತು ಮತ್ತು ನಾನಾ ವಿಧದ ಸುಖ ಸಂಪತ್ತು ಉಳ್ಳವನಾಗುತ್ತಾರೆ. ಭಾಗ್ಯ ಸ್ಥಾನದಲ್ಲಿ ಸೂರ್ಯ, ಬುಧ ಶುಕ್ರ ಯೋಗದಲ್ಲಿ ಜನಿಸಿದವನು ರಾಜ ಸಮಾನನೂ, ಪ್ರಖ್ಯಾತರೂ ಆಗುತ್ತಾರೆ. ಭಾಗ್ಯ ಸ್ಥಾನದಲ್ಲಿ ಚಂದ್ರ, ಗುರು, ಶುಕ್ರ ಇದ್ದರೆ ರಾಜನಿಗೆ ಸಮಾನನಾದವರು ಮತ್ತು ರಾಜ ಕುಲದಲ್ಲಿ ಜನಿಸಿದವರೂ ಆಗುತ್ತಾರೆ. ಭಾಗ್ಯ ಸ್ಥಾನದಲ್ಲಿ ಬುಧ, ಗುರು, ಶುಕ್ರರು ಇರುವಾಗ ಜನಿಸಿದವರು ಮಂತ್ರಿಗಳೂ, ಪಂಡಿತರೂ ಆಗುತ್ತಾರೆ. ಭಾಗ್ಯ ಸ್ಥಾನದಲ್ಲಿ ರವಿ ಚಂದ್ರ ಬುಧ, ಗುರು ಯೋಗದಲ್ಲಿ ಜನಿಸಿದವರು ಮಂತ್ರಿಯಿಂದ ಪೂಜಿತರೂ ಮತ್ತು ಸಂತೋಷವಂತರೂ ಆಗುತ್ತಾರೆ.- ಮೂಲ್ಕಿ ಹರಿಶ್ಚಂದ್ರ ಪಿ. ಸಾಲಿಯಾನ್ -ಸಂಗ್ರಹ