ಗುರು ಗೋಚಾರ ಪೀಡಾಪರಿಹಾರಾರ್ಥ ಜಪಮಂತ್ರಗಳು -

ದೇವಾನಾಂ ಚ ಋಷಿಣಾಂ ಚ ಗುರುಂ ಕಾಂಚನ ಸನ್ನಿಭಮ್ | ಬುದ್ಧಿಭೂತಂ ತ್ರಿಲೋಕೇಶಂ ತಂ ನಮಾಮಿ ಬೃಹಸ್ಪತಿಮ್ || (ದೇವತೆಗಳಿಗೂ ಮತ್ತು ಋಷಿಗಳಿಗೂ ಗುರುವಾದ, ಚಿನ್ನದ ಕಾಂತಿಗೆ ಸದೃಶವಾದ ಕಾಂತಿಯುಳ್ಳ, ಮೂರೂ ಲೋಕದಲ್ಲಿ ಅತುಲನೀಯ ಬುದ್ಧಿವಂತನಾದ ಬೃಹಸ್ಪತಿಗೆ ನಮಸ್ಕರಿಸುತ್ತೇನೆ.) ಇದು ಪ್ರಸಿದ್ಧವಾದ ಪುರಾಣೋಕ್ತ ಗುರು ಜಪಮಂತ್ರ. ಶ್ರೀವೇದವ್ಯಾಸ ವಿರಚಿತ ನವಗ್ರಹ ಸ್ತೋತ್ರಾಂತರ್ಗತವಾದದ್ದು. ಪ್ರತಿನಿತ್ಯ ಜಪಿಸುವುದರಿಂದ ಶೀಘ್ರವಾಗಿ ಫಲಪ್ರಾಪ್ತಿಯಾಗುತ್ತದೆ. ಗುರು ಪ್ರಸಾದಕ್ಕಾಗಿ ಜಪಸಂಖ್ಯೆ 19000. ಈ ಕೆಳಗಿನ ಮಂತ್ರವು ಬ್ರಹ್ಮಾಂಡಪುರಾಣೋಕ್ತ ಪೀಡಾಪರಿಹಾರಕ ಸ್ತೋತ್ರಾಂತರ್ಗತವಾಗಿದೆ. ಇದೂ ಸಹ ಶೀಘ್ರ ಫಲಪ್ರದ ಮಂತ್ರವಾಗಿದೆ, ದೇವಮಂತ್ರೀ ವಿಶಾಲಾಕ್ಷಃ ಸದಾ ಲೋಕಹಿತೇ ರತಃ | ಅನೇಕಶಿಷ್ಯಸಂಪೂರ್ಣಃ ಪೀಡಾಂ ಹರತು ಮೇ ಗುರುಃ || (ದೇವತೆಗಳ ಮಂತ್ರಿಯಾದ, ವಿಶಾಲವದ ನೇತ್ರಗಳುಳ್ಳ (ದೃಷ್ಟಿಯುಳ್ಳ), ಸರ್ವದಾ ಲೋಕಹಿತವನ್ನೇ ಚಿಂತಿಸುತ್ತಿರುವ, ಅನೇಕ ಶಿಷ್ಯರಿಂದ ಸಂಪನ್ನನಾದ ಹೇ ದೇವಗುರು ನನಗೆ ಒದಗಿದ ಪೀಡೆಗಳನ್ನು ಪರಿಹರಿಸು.) ಈ ಮಂತ್ರವನ್ನು ಪ್ರತಿನಿತ್ಯ ಕನಿಷ್ಟ ಪಕ್ಷ 108 ಬಾರಿಯಷ್ಟು ಜಪಿಸುವುದರಿಂದ ಗುರು ಗೋಚಾರ ಸೂಚಿತ ಅನಿಷ್ಟಗಳ ನಿವೃತ್ತಿಯಾಗುತ್ತದೆ. ಮೇಲಿನ ಎರಡೂ ಮಂತ್ರಗಳನ್ನು ಗುರು ಅಶುಭ ಗೋಚಾರವಿರುವ ರಾಶಿಯವರು ಅವಶ್ಯವಾಗಿ ಜಪಿಸಬೇಕು. ಗುರು ಪ್ರಸನ್ನತೆಗಾಗಿ ಪ್ರತೀ ಗುರುವಾರದಂದು ಗುರುಗಳ ಮಠ, ದೇವಸ್ಥಾನಗಳ ದರ್ಶನವನ್ನು ಮಾಡಬೇಕು. ಗುರು-ಆಚಾರ್ಯ, ದೈವ ನಿಂದೆಯನ್ನು ಸರ್ವಥಾ ಮಾಡಬಾರದು. ಗುರುಸಮಾನರಾದವರ ಸೇವೆಯನ್ನು ಮಾಡಬೇಕು. ಗುರು ಪೀಡಾಪರಿಹಾರಕ್ಕಾಗಿ ಸುವರ್ಣ ದಾನ, ಕಂಚಿನ ಪಾತ್ರೆ, ಪುಷ್ಕರಾಜ ಮಣಿ, ಕಡಲೆ, ಸಕ್ಕರೆ, ಹಳದೀ ಬಣ್ಣದ ವಸ್ತ್ರಗಳು ಮೊದಲಾದವುಗಳ ದಾನವನ್ನು ಸಹ ಮಾಡಬಹುದು.