ವ್ಯವಹಾರ ನಿರ್ಧರಿಸುವ ತಿಲ ರಹಸ್ಯ ಡಾ.ಅನಸೂಯ ಎಸ್.ರಾಜೀವ್

ವ್ಯವಹಾರ ನಿರ್ಧರಿಸುವ ತಿಲ ರಹಸ್ಯ ಡಾ.ಅನಸೂಯ ಎಸ್.ರಾಜೀವ್ ಪರಮಾತ್ಮನ ಲೀಲೆ ವಿಚಿತ್ರವಾದುದು. ಅವನು ಮನುಷ್ಯನಿಗೆ ಬುದ್ಧಿಶಕ್ತಿಯನ್ನು ಕೊಟ್ಟು ಉನ್ನತಮಟ್ಟದಲ್ಲಿಟ್ಟ. ಮನುಷ್ಯನು ತನ್ನ ಪ್ರತಿಭಾಶಕ್ತಿಯಿಂದ ಗೂಢವಿದ್ಯೆಗಳನ್ನು ಅಭ್ಯಾಸ ಮಾಡಿದ. ಶರೀರದಲ್ಲಿರುವ ಮಚ್ಚೆಗಳ ಮೂಲಕ ಮನುಷ್ಯನ ಸ್ವಭಾವ, ಆಚಾರ, ವ್ಯವಹಾರಗಳನ್ನು ನಿರ್ಧರಿಸುವುದೇ ತಿಲ ರಹಸ್ಯ. ಭಾರತೀಯ ಆಚಾರ್ಯರು ತಿಲದ ವರ್ಣಗಳ ಬಗ್ಗೆ ಹೀಗೆ ತಿಳಿಸಿರುತ್ತಾರೆ. ಜಾತಕದಲ್ಲಿ ರವಿ, ಕುಜರು ಬಲಾಢ್ಯರಾಗಿದ್ದರೆ ಕೆಂಪು ವರ್ಣದ ಮಚ್ಚೆಯನ್ನು ಜಾತಕರು ಹೊಂದಿರುತ್ತಾರೆ. ಚಂದ್ರ, ಶುಕ್ರ ಬಲಾಢ್ಯರಾಗಿದ್ದರೆ ಬಿಳಿ ಬಣ್ಣದ ಮಚ್ಚೆ, ಗುರು ಬಲಾಢ್ಯನಾಗಿದ್ದರೆ ಜೇನು ವರ್ಣದ ಮಚ್ಚೆ, ಶನಿ ಬಲಾಢ್ಯನಾಗಿದ್ದರೆ ಕಪ್ಪು ಬಣ್ಣದ ಮಚ್ಚೆಯನ್ನು ಹೊಂದಿರುತ್ತಾರೆ. ಹೀಗೆ ವ್ಯಕ್ತಿಗಳಿಗೆ ಯಾವ ಗ್ರಹ ಬಲಾಢ್ಯವಾಗಿರುವುದೋ ಆ ಗ್ರಹದ ವರ್ಣದ ಮಚ್ಚೆ ಇರುತ್ತದೆ. ಶಿರೋ ಭಾನು: ಮುಖ:ಚಂದ್ರ: ಕಂಠೇ ಕುಜ: ವಕ್ಷೇ ಬುಧ: ಉದರೇ ಗುರು: ಗುಹ್ಯೇ ಶುಕ್ರ: ಜಂಘೇ ಶನಿ: ಪಾದಾಭ್ಯೋ ರಾಹು ಕೇತುಶ್ಚ ಎಂಬ ಸೂತ್ರದಂತೆ ದೇಹದ ಯಾವ ಭಾಗದಲ್ಲಿ ಮಚ್ಚೆ ಕಾಣುತ್ತದೋ ಆ ಭಾಗವನ್ನಾಳುವ ಗ್ರಹ ಬಲಾಢ್ಯವಾಗಿರುತ್ತದೆ ಎಂದು ಅವರು ತಿಳಿಸಿರುತ್ತಾರೆ. ನಕ್ಷತ್ರ ಪುರುಷನ ಅಂಗಗಳಿಗೆ ಸಂಬಂಧಿಸಿದ ಜಾಗದಲ್ಲಿ ಮಚ್ಚೆ ಇದ್ದರೆ ಆಯಾ ನಕ್ಷತ್ರದಲ್ಲಿ ಹುಟ್ಟಿದವರು ಅಥವಾ ಆ ನಕ್ಷತ್ರಗಳ ಅಧಿಕ ಪ್ರಭಾವಕ್ಕೆ ಒಳಗಾದವರು ಎಂದೂ ತಿಳಿಸಿರುತ್ತಾರೆ. ಅಶ್ವಿನಿಗೆ ತೊಡೆ, ಭರಣಿಗೆ ತಲೆ, ಕೃತ್ತಿಕಾಗೆ ಸೊಂಟ, ರೋಹಿಣಿಗೆ ತೊಡೆ, ಮೃಗಶಿರಾಗೆ ಕಣ್ಣುಗಳು, ಆರಿದ್ರಾಗೆ ಕೂದಲು, ಪುನರ್ವಸುಗೆ ಬೆರಳುಗಳು, ಪುಷ್ಯಗೆ ಬಾಯಿ, ಆಶ್ಲೇಷಾಗೆ ಉಗುರುಗಳು, ಮಖಾಗೆ ಮೂಗು, ಪುಬ್ಬಾಗೆ ಗುಹ್ಯಾಂಗ, ಉತ್ತರಾಗೆ ಗುಹ್ಯಾಂಗ, ಹಸ್ತಾಗೆ ಕೈಗಳು, ಚಿತ್ತಾಗೆ ಕೆನ್ನೆ, ಹಣೆ ಭಾಗಗಳು, ಸ್ವಾತಿಗೆ ಹಲ್ಲುಗಳ ಮೇಲಿನ ವಸಡುಗಳು, ವಿಶಾಖಗೆ ತೋಳುಗಳು, ಅನುರಾಧಾಗೆ ಎದೆ, ಜ್ಯೇಷ್ಠಕ್ಕೆ ಕತ್ತು, ಮೂಲಾಗೆ ಕಾಲು, ಪೂರ್ವಾಷಾಢಾಗೆ ವಕ್ಷಸ್ಥಳ, ಶ್ರವಣಾಗೆ ಕಿವಿಗಳು, ಧನಿಷ್ಟಾಗೆ ಬೆನ್ನು, ಶತ:ಭಿಷಾಗೆ ಕೆನ್ನೆಗಳು, ಗಲ್ಲ, ಪೂರ್ವಾಭಾದ್ರಾಗೆ ಪಾರ್ಶ್ವಗಳು, ಉತ್ತರಾಭಾದ್ರಾಗೆ ಪಾರ್ಶ್ವಗಳು, ರೇವತಿಗೆ ಹೊಟ್ಟೆ ಎಂದು ತಿಳಿಸಿರುತ್ತಾರೆ. ಕಾಲ ಪುರುಷನ ಅಂಗಗಳಿಗೆ ಸಂಬಂಧಿಸಿದಂತೆ ಆಯಾ ಲಗ್ನದವರಿಗೆ ಆಯಾಭಾಗದಲ್ಲಿ ಮಚ್ಚೆ ಇರುತ್ತದೆ ಎಂದು ಜನನ ಲಗ್ನ ಹಾಗೂ ಮಚ್ಚೆಗಳ ಸಂಬಂಧದ ಬಗ್ಗೆ ಹೀಗೆ ತಿಳಿಸಿರುತ್ತಾರೆ. ಮೇಷ ಲಗ್ನದವರಿಗೆ ತಲೆ, ಮುಖ, ತುಟಿ ಗಡ್ಡದ ಭಾಗಗಳಲ್ಲಿ ಮಚ್ಚೆಗಳಿರುತ್ತವೆ. ವೃಷಭ ಲಗ್ನದವರಿಗೆ ಕೊರಳ ಬಳಿ ಮಚ್ಚೆ ಇರುತ್ತವೆ. ಮಿಥುನ ಲಗ್ನದವರಿಗೆ ಭುಜ ಭಾಗದಲ್ಲಿ, ಕಟಕ ಲಗ್ನದಲ್ಲಿ ಜನಿಸಿದವರಿಗೆ ಎದೆ ಭಾಗದಲ್ಲಿ, ಸಿಂಹ ಲಗ್ನದವರಿಗೆ ಸೊಂಟ , ತುಲಾ ಲಗ್ನದವರಿಗೆ ನಾಭಿಯ ಸ್ಥಳದಲ್ಲಿ, ವೃಶ್ಚಿಕ ಲಗ್ನದವರಿಗೆ ಗುಹ್ಯ ಸ್ಥಾನದಲ್ಲೂ ಬೆನ್ನಿನ ಭಾಗದಲ್ಲಿ, ಧನುರ್ಲಗ್ನದಲ್ಲಿ ಜನಿಸಿದವರಿಗೆ ಎಡ, ಬಲ ತೊಡೆಗಳಲ್ಲಿ, ಮಕರ ಲಗ್ನದವರಿಗೆ ಎಡ, ಬಲ ಕಾಲು ಮತ್ತು ಮೊಣಕಾಲು. ಕುಂಭ ಲಗ್ನದಲ್ಲಿ ಜನಿಸಿದವರಿಗೆ ಎರಡೂ ಕಾಲುಗಳ ಹಿಮ್ಮಡಿಯಲ್ಲಿ ಕಾಲುಗಳ ಗಂಟುಗಳ ಬಳಿ ಮಚ್ಚೆಗಳಿರುತ್ತವೆ. ಮೀನ ಲಗ್ನದವರಿಗೆ ಎಡ, ಬಲ ಪಾದಗಳು, ಅಂಗಾಲುಗಳ ಭಾಗದಲ್ಲಿ ಮಚ್ಚೆಗಳಿರುತ್ತವೆ. ಲಗ್ನಕ್ಕೆ ಯಾವ ಯಾವ ಗ್ರಹಗಳ ಸಂಬಂಧವಿರುತ್ತದೆಯೋ ಆಯಾ ಭಾಗಗಳಲ್ಲೂ ಮಚ್ಚೆಗಳು ಇರುತ್ತವೆ. ಗಂಡಸರಿಗೆ ದೇಹದ ಬಲ ಭಾಗದ ಮೇಲೆ ಮಚ್ಚೆ ಇದ್ದರೆ ಶುಭ ಸೂಚಕವೆಂದೂ, ಹೆಂಗಸರಿಗೆ ಎಡ ಭಾಗದಲ್ಲಿದ್ದರೆ ಶುಭ ಸೂಚಕವೆಂದೂ ಅಂತಹವರಿಗೆ ಲಕ್ಷ್ಮೀದೇವಿ ಜತೆಯಲ್ಲಿರುತ್ತಾಳೆಂಬ ಉಕ್ತಿಯೂ ಇದೆ. ಇನ್ನು ಪಾಶ್ಚಾತ್ಯ ಆಚಾರ್ಯರು ಮಚ್ಚೆಗಳ ಬಗ್ಗೆ ಸಾಕಷ್ಟು ಉಲ್ಲೇಖಿಸಿರುತ್ತಾರೆ. ಅವರಲ್ಲಿ ವರ್ನಿಯಾ್ ಪ್ರಮುಖರು. ಪ್ರಕೃತಿಯು ವ್ಯಾಪಾರಿ ಇದ್ದಂತೆ. ವ್ಯಾಪಾರಿಯು ತನ್ನ ಅಂಗಡಿಯಲ್ಲಿರುವ ಸಾಮಾನುಗಳನ್ನೆಲ್ಲ ಪ್ರದರ್ಶನಕ್ಕೆ ಇಡುವುದಿಲ್ಲ. ಇದರಿಂದ ಗ್ರಾಹಕನು ಒಳಗೆ ಏನೇನು ವಸ್ತುಗಳಿವೆ ಎಂದು ಗ್ರಹಿಸುತ್ತಾನೆ. ಹಾಗೆಯೇ ಈ ಶರೀರವೆಂಬ ಅಂಗಡಿಯ ವಸ್ತುಗಳು ಮುಖದಲ್ಲಿ ಮಚ್ಚೆಗಳ ರೂಪದಲ್ಲಿ ಕಂಡುಬರುತ್ತವೆ. ಈ ಮಚ್ಚೆಗಳ ಅಧ್ಯಯನದಿಂದ ಶರೀರದ ಬೇರೆ ಬೇರೆ ಭಾಗಗಳಲ್ಲಿರುವ ಮಚ್ಚೆಗಳ ಫಲವನ್ನು ತಿಳಿದುಕೊಳ್ಳಬಹುದು ಎಂಬ ವಿಷಯ ವಸ್ತುವನ್ನು ಆಧಾರವಾಗಿಟ್ಟುಕೊಂಡೇ ಮಚ್ಚೆಗಳ ಅಧ್ಯಯನವನ್ನು ಮಾಡಿರುತ್ತಾನೆ. ಮುಖದಲ್ಲಿ 55 ಮಚ್ಚೆಗಳನ್ನು ಗುರುತಿಸಿರುತ್ತಾನೆ. ಹಣೆಯಲ್ಲಿ 12, ಕಣ್ಣುಗಳಲ್ಲಿ 9, ಕಿವಿಗಳಲ್ಲಿ 5, ಗಲ್ಲದಲ್ಲಿ 5, ಕೆನ್ನೆಗಳಲ್ಲಿ 7, ಮೂಗಿನಲ್ಲಿ 8, ಗದ್ದದಲ್ಲಿ 9 ಎಂಬುದಾಗಿ ವಿಭಜಿಸಿ ಅದಕ್ಕೆ ಫಲ ಪರಿಹಾರಗಳನ್ನೂ ನೀಡಿರುತ್ತಾನೆ.